05. janúar. 2015 09:01
MAR er nýtt íslenskt leikverk úr smiðju Frystiklefans í Rifi. Verkið er byggt á tveimur sjóslysum sem urðu við strendur Snæfellsness á síðustu öld. „Fyrra slysið átti sér stað í febrúar 1962 þegar togarinn Elliði sökk út af Öndverðarnesi. Í áhöfninni voru 28 manns. 26 björguðust. Síðara slysið varð í júlí 1997 þegar trillan Margrét hvarf ásamt tveimur mönnum. Báðir voru þeir úr bæjarfélaginu. Slysin eru nátengd okkar samfélagi og margir heimamenn tóku þátt í björgunaraðgerðum,“ segir Kári Viðarsson leikhússtjóri.
Fyrirhugaðar voru fjórar sýningar á verkinu en vegna góðrar viðtöku og mikillar eftirspurnir urðu sýningarnar tíu talsins yfir hátíðarnar. „Nú er svo komið að við höfum ákveðið að halda sýningum áfram um helgar í janúar. Þar sem ekki stendur til að koma með þessa sýningu til Reykjavíkur hefur Frystiklefinn ákveðið að bjóða þeim áhorfendum sem vilja, ókeypist gistingu í húsinu. Þetta er gert til að koma til móts við ferðakostnað gesta og veita þeim í senn tækifæri til að gera sér góða helgarferð um Snæfellsnes, sem er ægifagurt á þessum árstíma.
Texti verksins MAR er byggður á viðtölum við aðila sem tengjast slysunum og raunverulegum upptökum frá talstöðvasamskiptum á neyðarbylgju útvarpsins. Hér er um að ræða algjörlega einstaka gerð heimildar, sem aldrei hefur verið nýtt í íslensku leikhúsi áður. Leikarar í sýningunni eru þau Kári Viðarsson og Freydís Bjarnadóttir, sem segir sína eigin sögu í verkinu. Leikstjóri er Árni Grétar Jóhannson. Þetta nýja leikverk verður mikilvæg viðbót við sagnaarf Íslendinga. Markmið verksins er að dýpka skilning áhorfenda á þeim afleiðingum sem slík stórslys hafa í för með sér á sjó og í landi.
Að lokum skal vísað í afar jákvæðan leikdóm Magnúsar Þórs Hafsteinssonar blaðamanns sem birtist í síðasta tölublaði Skessuhorns.