08. janúar. 2015 08:00
Laugardaginn 10. janúar klukkan 13.00 verður opnuð sýning á verkum Michelle Bird í Safnahúsinu í Borgarnesi. Litir Borgarness er fyrsta sýning listakonunnar hér á landi, en hún er nýflutt til Íslands og býr í Borgarnesi. Í verkum hennar má sjá hvernig hún sem listamaður og nýr íbúi upplifir mannlíf og umhverfi nýs framandi staðar. Ennfremur hefur Michelle stillt upp vinnustofu í anddyri sýningarrýmisins þar sem hægt er að sjá helstu verkfæri, liti og fleira. Sýningin er í Hallsteinssal í Safnahúsi, en sýningarrýmið er nefnt eftir Hallsteini Sveinssyni sem var mikill listunnandi sem gaf ævisöfnun sína á listaverkum til íbúa Borgarness árið 1971. Vonast er til að skólar geti nýtt sér sýninguna til fræðslu fyrir nemendur um myndlist og vinnuaðferðir við hana.
Michelle Bird er fædd í San Francisco árið 1965. Hún er ættuð frá Bandaríkjunum og Kína en ólst upp í San Francisco, Hawai og víðar í Kaliforníu. Hingað kemur hún frá Sviss þar sem hún hefur haft vinnustofu síðustu árin. Hún lærði myndlist í Bandaríkjunum og í Hollandi þar sem hún var búsett um tíma. Þar lærði hún við Rietveld listaháskólann. Michelle Bird hefur sýnt víða um Evrópu og í Bandaríkjunum. Hún hefur haldið fyrirlestra um myndlist og haldið vinnustofur („workshops“) og auk málaralistarinnar hefur hún lagt stund á listrænt handverk. Nánar er hægt að fræðast um listakonuna í heilsíðuviðtali sem birtist í síðasta tölublaði Skessuhorns.
Sýningin Litir Borgarness stendur til 25. febrúar. Hún verður opin til kl. 16.00 á opnunardaginn og listakonan verður á staðnum þann tíma. Eftir það verður sýningin opin á virkum dögum 13.00 – 18.00 eða á öðrum tímum eftir samkomulagi. Aðgangur er ókeypis.