Eftir langt jólahlé fóru Skagamenn á Hlíðarenda síðastliðinn föstudag þar sem þeir mættu Val í fyrstu deildinni í körfuboltanum. Úr varð hörkuviðureign þar sem Skagamenn knúðu fram 70:67 sigur og bættu þar með stöðu sína í deildinni, eru nú komnir með tíu stig og sem stendur í fjórða sæti deildarinnar. Jafnræði var með liðunum í fyrsta leikhluta en staðan eftir hann var 23:22 heimamönnum í vil. ÍA var mun betra liðið í öðrum leikhluta og í hálfleik voru Skagamenn með ellefu stiga forystu 48:37. Ólíkt mörgum leikjum í vetur héldu Skagamenn sjó í þriðja leikhluta, þó síðari hálfleikurinn fari sennilega ekki í sögubækurnar fyrir frábæran sóknarleik. Báðum liðum gekk illa að skora en þó heimamönnum verr en gestunum. Staðan var 61:46 Skagamönnum í vil fyrir lokaleikhlutann og litlar vísbendingar um að Valsmenn kæmu til baka. Það gerðu þeir hins vegar svo um munaði. Þeir skiptu í svæðisvörn og pressuvörn allan völlinn sem Skagamenn virtust eiga í miklum erfiðleikum með. Svo virtist sem gestirnir væru að falla í þá gryfju að ætla að halda forskotinu, frekar en að auka við það. Valsmenn skoruðu til að mynda síðustu átta stigin í leiknum. Lokamínútan var æsispennandi en niðurstaðan eins og áður segir 70:67 fyrir ÍA.