Síðastliðinn föstudag undirrituðu Knattspyrnufélag ÍA og Olís nýjan samstarfssamning til þriggja ára. Í tilkynningu frá félaginu segir að frá 1982 hafi Olís verið einn af aðalsamstarfsaðilum Knattspyrnufélags ÍA. Á þeim tíma hefur samstarfið verið báðum aðilum farsælt og hefur Knattspyrnufélag ÍA til að mynda skilað 16 Íslands- og bikarmeistaratitlum í meistaraflokki karla á þessu tímabili.

„Við hjá Knattspyrnufélagi ÍA erum ákaflega stoltir af því að Olís hefur ákveðið að endurnýja samstarfssamning við okkur og lítum á það sem mikið traust á þeirri miklu uppbyggingarvinnu sem farið hefur fram í félaginu á undanförnum árum.  Við sjáum þess merki í starfi félagsins að bjartari tímar eru framundan og vonandi er þess ekki langt að bíða að enn betri árangur skili sér í hús. Það er jafnframt von okkar að félagsmenn og aðrir stuðningsmenn ÍA fylki sér á bakvið þá aðila sem styðja félagið,“ segir Magnús Guðmundsson formaður Knattspyrnufélags ÍA.