Í Skessuhorni í síðustu viku, blaðinu sem kom út 1. júlí, var sagt frá slysi sem varð við Ánahlíð í Borgarnesi þegar grjót féll úr hlíð og lenti ofan á tveimur börnum. Í blaðinu var rætt við konu sem varð vitni að slysinu, hringdi á Neyðarlínuna og var hjá börnunum þar til hjálp barst. Sagði hún í viðtalinu að tekið hafi 10 mínútur frá því hún hringdi og þar til sjúkrabíll, læknir og allir viðbragðsaðilar voru komnir. Þessi frásögn var ekki nákvæm. Þarna hefði þurft að vera að fyrsti viðbragðsaðili kom á staðinn innan við tveimur mínútum eftir óhappið. Fyrst á staðinn til að veita aðstoð var sjúkraflutningamaður sem þurfti stutt að fara þar sem viðkomandi var staddur í næsta húsi. Ekki leið þannig meira en hálf önnur mínúta þar til umræddur sjúkraflutningamaður, Þorgerður Bjarnadóttir, var komin á slysstað og gat aðstoðað konuna við að ná grjótinu ofan af öðru barninu. Sjúkrabíll og aukin aðstoð barst síðan skömmu síðar. Þetta leiðréttist hér með og hlutaðeigandi beðnir afsökunar.