09. júlí. 2015 01:43
Vorið var kalt þannig að viðskiptin hjá mér hófust ekki fyrr en 12. júní. Síðan þá má segja að það hafi verið stöðugur straumur fólks hingað og fín viðskipti,“ segir Sædís Guðlaugsdóttir í gróðrarstöðinni Gleym mér ei í Borgarnesi. Gróðrarstöðin er vel í sveit sett, í þjóðbraut við vegamótin vestur á Snæfellsnes og norður í land við Sólbakka í Borgarnesi. Sædís ræktar og selur selur mikið úrval fjölærra plantna ásamt úrvali af sumarblómum, kál- og kryddjurtum og trjáplöntum. Hún segir að viðskiptavinir komi víða af landinu og sumir yfir langan veg. Meðal annars segir hún að fólk hafi gert sér sérstaka ferð austan af Norðfirði og hópur kom nýlega frá Ólafsfirði svo dæmi séu tekin.
„Heimafólkið er líka duglegt að kaupa plöntur í sinni heimabyggð og raunar Vestlendingar allir. Við höfum mjög breitt vöruúrval og fólk veit að hverju það getur gengið,“ segir Sædís. Nú eru tímamót framundan í gróðrarstöðinni því 1. júlí á næsta ári verða 30 ár liðin frá því ræktun og sala hófst hjá Sædísi í Gleym mér ei, fyrst í smáum stíl, en veltan hefur aukist öll 29 árin sem stöðin hefur verið starfrækt. Áður hafði Sædís menntað sig í garðyrkjunni og unnið á gróðrarstöðvum m.a. í Reykholtsdal og Reykjavík. Fjölskylda Sædísar heldur til á svæðinu og hefur komið sér notalega fyrir í hlýlegu húsi á lóð stöðvarinnar. Þá leggur móðir Sædísar, Guðbjörg Svavarsdóttir, einnig gjörva hönd á plóg og er vakandi og sofandi yfir garðyrkjunni ásamt Sædísi og fjölskyldu hennar.
Meðfylgjandi myndir voru teknar í góðviðrinu í gær í Gleym mér ei.