Veiðibann var sett á hörpuskelveiðar í Breiðafirði árið 2003 eftir að stofninn hrundi að því er talið var vegna sýkingar sníkjudýra. Þetta var á sínum tíma mikið áfall fyrir atvinnulífið bæði í Stykkishólmi og Grundarfirði. Nú loks eftir um 13 ára stopp eru horfur á að rofi til að nýju. „Við erum búin að sinna rannsóknum á ákveðnum skelmiðum hér í Breiðafirði síðan í september á síðasta ári í samvinnu við Fisk Seafood og Hafrannsóknastofnun. Þeim kemur til með að ljúka í næsta mánuði. Þetta hefur gengið ágætlega. Skelin sem slík lítur vel út. Hún er bæði stór og falleg og ekki að sjá að í henni sé nein sýking. Nýliðun virðist einnig í góðu lagi. Við finnum töluvert af ungri skel á þessum svæðum sem við höfum verið að skoða. Heilt yfir þá erum við hóflega bjartsýn á framtíðina varðandi nýtingu skeljarinnar í Breiðafirði,“ segir Sigurður Ágútssson framkvæmdastjóri sjávarútvegsfyrirtækisins agustson ehf. í Stykkishólmi.

Nánar er rætt við Sigurð í Skessuhorni vikunnar.