Skallagrímur tók á mót Val í 1. deild karla í körfuknattleik síðastliðinn föstudag. Jafnt var á með liðunum framan af fyrri hálfleik. Leikmenn Skallagríms náðu góðum kafla í öðrum leikhluta sem tryggði þeim 12 stiga forskot í hálfleik, 42-30. Skallagrímsmenn héldu áfram að stjórna leiknum í síðari hálfleik og Valsmenn eltu. Slakur sóknarleikur gestanna og léleg skotnýting var þeim til trafala í síðari hálfleik. Heimamenn áttu því ekki í vandræðum með að halda þeim í skefjum. Munurinn hélst að kalla óbreyttur frá upphafi síðari hálfleiks til leiksloka og Skallagrímur vann góðan 14 stiga sigur, 92-78.

J.R. Cadot fór hamförum í liði Skallagríms og náði fyrstu þrennu sinni í búningi Borgarnessliðsins. Hann skoraði 25 stig, reif niður 19 fráköst og gaf ellefu stoðsendingar. Næstur honum kom Sigtryggur Arnar Björnsson með 21 stig, sjö fráköst og fimm stoðsendingar.

Með sigrinum lyfti Skallagrímur sér upp í þriðja sæti deildarinnar með 14 stig eftir tíu leiki. Næst etur liðið kappi við Ármann á útivelli föstudaginn 22. janúar næstkomandi.