Bikarmót Kraftlyftingasambands Íslands í klassískum lyftingum var haldið í fyrsta sinn í gær. Mótið fór fram á Seltjarnarnesi í umsjón Gróttu. Tæplega 40 manns voru mættir til leiks og fór mótið fram á tveimur keppnispöllum samtímis. Þónokkur Íslandsmet voru slegin á mótinu bæði í opnum flokkum og aldurstengdum. Eitt Norðurlandamet féll þegar Arnór Gauti Haraldsson tvíbætti Norðurlandamet drengja (14-18) með 192,5 kg og 200 kg í hnébeygju. Stigahæstu keppendur mótsins í karla- og kvennaflokki voru krýndir Bikarmeistarar í klassískum kraftlyftingum. Þeir fengu afhenda veglega farandbikara auk bikara til eignar. Bikarmeistari kvenna varð Arnhildur Anna Árnadóttir Gróttu. Bikarmeistari karla varð Einar Örn Guðnason, Kraftlyftingafélagi Akraness, með 438,1 Wilksstig. Einar bætti Íslandsmet í öllum greinum. Í hnébeygju tók hann 260 kg, í bekkpressu endaði hann með 183 kg og í réttstöðulyftu tvíbætti hann metið með 270 kg í annarri tilraun og 280 kg í þeirri þriðju.

Veitt voru verðlaun fyrir stigahæstu lið mótsins í karla- og kvennaflokki. Liðabikar kvenna sigraði fjölmenn kvennasveit Gróttu örugglega með 51 stigi. Liðabikar karla sigraði karlasveit Kraftlyftingafélags Akraness örugglega með 52 stigum. Úrslit í einstökum þyngdarflokkum og þau Íslandsmet sem voru slegin er að finna í heildarúrslitum mótsins í gagnabanka KRAFT.