Fiðraðir sumargestir koma nú til landsins hver af öðrum.  Að sögn Sverris Heiðars, kennara og fuglaáhugamanns á Hvanneyri, þá komu fystu grágæsirnar í Hvanneyrartúnið þann 9. mars sl.  Á mánudaginn sá hann svo fyrstu lóuna þetta vorið og á þriðjudaginn var svo mættur "þröstur í tún" eins og segir í kvæðinu.  Sífellt fjölgar svo stara á Hvanneyri og undanfarnar vikur hafa flokkar þeirra leitað ætis í görðum staðarbúa.  Þar hafa þeir gert sér að góðu leyfarnar, sem snjótittlingarnir höfðu ekki af að innbyrða í vetur, en Hvanneyringar eru mjög duglegir við að fóðra þá, þegar jarðbönn eru.  Auðnutittlingurinn er svo nánast daglegur gestur allan veturinn í görðum staðarbúa og óvenju mikið hefur Sverrir séð af músarrindli á Hvanneyri í vetur.  Þannig að það er ekki bara mannlífið og skólastarfið sem blómstrar á Hvanneyri, heldur virðist náttúran fylgja þeirri uppsveiflu.