08. júní. 2005 10:36
Kirkjuleiðtogar Lútherskra kirkna í Evrópu komu saman til fundar í Reykholti í Borgarfirði í dag og munu dvelja þar til mánudags. Um níutíu manns sækja fundinn, þar á meðal Ishmail Noko, aðalritari Lútherska heimssambandsins.
Það er Evrópudeild Lútherska heimssambandsins sem stendur fyrir þinginu og er markmiðið að ræða ýmis þau málefni er snerta sérstaklega Lútherskar kirkjur í Evrópu. Meðal annars verður rætt um mismunandi gerðir kirkna, aðstæður þeirra og þarfir umhverfisins í boðun og samfélagi. Hverjar eru helstu áskoranirnar við upphaf nýrrar aldar? Hver er reynsla kirknaleiðtoganna? Hvernig geta lúthersku kirkjurnar í Evrópu unnið að einingu í samfélaginu, grætt mein aðskilnaðar og annarra erfiðleika í álfunni og verið trúar hlutverki sínu og boðun? Þessar og fleiri spurningar verður glímt við í Reykholti.
Að sögn Dr. Andreas Wöhle, yfirmanns Evrópudeildar Lútherska heimssambandssins, hefur fundur sem þessi ekki verið haldinn síðan 1999 en stefnt er að því að halda þá á tveggja til þriggja ára fresti. „Marmiðið er að fá kirkjuleiðtoga saman til að fara yfir það sem efst er á baugi og hvernig það hefur áhrif í starfi kirknanna. Á þessum fundi ætlum við að skoða áhrif þeirra ákvarðana sem teknar voru á aðalþingi Heimssambandsins í Winnepeg 2003 og sjá hvernig það kemur fram í starfi safnaðanna.“
Þrátt fyrir rigningu við komuna í Reykholt er Dr. Wöhle hrifinn af staðnum. „Staður sem þessi hentar afar vel fyrir fundi af þessu tagi. Það er auðveldara fyrir fólk að einbeita sér að efni fundarins þegar við erum öll á einum stað.“ Þó að dagskráin sé þétt verður samt tími til að kynnast sögu og menningu Borgarfjarðar, bæði Reykholts og nærsveita.
Þátttakendur koma frá flestum Lútherskum kirkjum álfunnar, þar á meðal frá Rússlandi, Serbíu og Svartfjallalandi, Slóvakíu og Eystrasaltslöndunum. Auk Ishmail Noko kemur flytur Kjell Nordstokke, yfirmaður deildar um boðun – og þróunarstarf hjá Lútherska heimssambandinu erindi á þinginu.