Á síðasta fundi bæjarráðs Grundarfjarðar lýsti fulltrúi Vinstri hreyfingarinnar græns framboðs í bæjarstjórn Grundarfjarðar yfir vanþóknun á ákvörðun meirihlutaflokkanna að vísa Garðari Svanssyni, bæjarfulltrúa J – listans, úr bæjarráði sem áheynarfulltrúa. Ákvörðun meirihlutaflokkanna, Sjálfstæðisflokks og Framsóknarflokks, kemur í kjölfar yfirlýsingar frá Vinstri hreyfingunni grænu framboði þess efnis að flokkarnir ætli að standa að sameiginlegu framboði fyrir næstu bæjarstjórnarkosningar í Grundarfirði. “Eftir síðustu kosningar fékk fulltrúi J listans engin embætti og því var ákveðið að hann fengi sæti sem áheyrnarfulltrúi í bæjarráði en VG á þar fulltrúa,” segir Guðni Hallgrímsson oddviti Framsóknarmanna í bæjarstjórn Grundarfjarðar og formaður bæjarráðs. “Síðan hefur það gerst að J listi og VG hafa myndað einhvers konar kosningabandalag og eru farnir að vinna saman. Því er eðlilegt að þeir hafi bara einn fulltrúa í bæjarráði eins og hinir flokkarnir. Framsóknarmenn og Sjálfstæðismenn eiga samtals fimm bæjarfulltrúa á móti tveimur úr minnihlutanum en einungis einn fulltrúa í bæjarráði. Þetta eru því eðlileg hlutföll,” segir Guðni.