15. ágúst. 2005 09:37
Fjöldinn allur af fólki lagði leið sína í Stykkishólm um síðustu helgi til að njóta Danskra daga. Talið er að um 10.000 manns hafi verið í Hólminum, enda er þetta ein stærsta bæjarhátíð landsins. Þetta skiptið voru Hólmarar ekki eins heppnir með veður og í fyrra, enda erfitt að slá þeirri rjómablíðu við, en þó var ágætis veður á laugardeginum þegar aðal dagskráin fór fram í bænum. Þá var boðið upp á skemmtiatriði á hátíðarsvæði og bryggjuball, meðal annars.
Sjá myndir frá hátíðinni í Skessuhorni nk. miðvikudag.
Hápunktar Danskra daga voru margir, en helst er að nefna komi dönsku Eurovision hetjunnar Jakob Sveistrup og ball um borð í Baldri í höfninni. Að sögn lögreglu fór allt vel fram, fyrir utan einhverjar ryskingar á laugardagskvöldinu. Þurfti að fjarlægja þrjá menn af ballinu og kæla þá niður. Upp kom eitt fíkniefnamál á föstudagskvöldinu. Lögreglan sagði annars hafa verið eril á laugardagskvöldinu svona eins og búast mátti við, en í allt hafi þetta gengið mjög vel og hrósuðu þeir sérstaklega gæslunni á ballinu í Baldri.