06. febrúar. 2006 05:29
Samkvæmt könnun Rannsóknar og greiningar hefur hassneysla minnkað úr að vera 22% meðal barna í 10. bekk grunnskólanna á Akranesi árið 2001 niður í 3% árið 2005. Þetta kemur m.a. fram í nýútgefinni skýrslu, Stefnumótun og markmiðssetning lögreglunnar á Akranesi, sem unnin var af Jóni S. Ólafssyni yfirlögregluþjóni og fleirum. Fram kemur í skýrslunni að mikið forvarnarstarf hafi átt sér stað undanfarin ár þar sem mikil áhersla hafi verið lögð á foreldrafræðslu og jafnframt hefur samstarf lögreglu við foreldrafélög grunnskólanna aukist til muna. “Ávinningur lögreglunnar er að kynna starfsemi sína og koma á auknum tengslum við börn, ungmenni og foreldra og auka þar með jákvæð samskipti og upplýsingastreymi frá hinum almenna borgara til lögreglu,” segir í skýrslunni.
Starf lögreglunnar á Akranesi árið 2005 gekk að mörgu leyti vel þar sem skemmdarverkum, slysum í umferð og afskiptum af fíkniefnamálum fækkaði en fjöldi innbrota var svipaður frá árinu áður. Umferðaróhöppum, sem lögreglan á Akranesi sinnti, fjölgaði á árinu en þá verður að hafa í huga að starfssvæðið hefur stækkað með aukinni samvinnu við lögreglu í nágrannabyggðarlögum.