13. febrúar. 2006 10:09
Á aðalfundi Knattspyrnufélags ÍA sem haldinn var í síðustu viku kom fram að tæplega 8,7 milljóna króna tap varð af Rekstrarfélagi meistaraflokks ÍA og 2. flokks. Er það mun verri afkoma en árið á undan en þá var tapið tæplega ein milljón krónur. Að sögn Guðlaugs Kr. Gunnarssonar framkvæmdastjóra félagsins er helsta skýring á versnandi afkomu félagsins að leita í minnkandi tekjum félagsins. Munar þar mestu um að félagið naut ekki tekna af þátttöku í Evrópukeppni á liðnu ári og einnig voru minni tekjur vegna sölu leikmanna. Rekstrartekjur félagsins drógust því saman úr 50,7 milljónum króna árið 2004 í rúmar 38,6 milljónir króna í fyrra. Stærsti útgjaldaliður félagsins var laun og launatengd gjöld eða 28,6 milljónir króna. Guðlaugur segir að undanfarið hafi verið unnið hörðum höndum við að skera niður kostnaðarliði hjá félaginu og einnig eru í undirbúningi ýmsar leiðir til fjáröflunar.
Mun betri afkoma varð af rekstri yngri flokka félagsins á síðasta ári. Hagnaður af rekstri þeirra nam rúmum 3,4 milljónum króna en árið áður varð hagnaðurinn rúmar 2,3 milljónir króna. Rekstrartekjur yngri fokkanna voru tæpar 23,5 milljónir króna. Af einstökum tekjuliðum má nefna að tekjur af mótahaldi námu tæplega 8,9 milljónum króna. Rekstargjöld yngri flokka voru tæpar 20,2 milljónir króna. Stærsti kostnaðarliðurinn var þjálfunarkostnaður að upphæð tæpar 12,5 milljónir króna.
Í skýrslu Rekstrarfélags meistaraflokks og 2. flokks segir að nú séu viðræður í gangi við aðalstyrktaraðila félagsins, KB banka, um endurnýjun á samningi félagsins og að vonast sé til þess að þær viðræður geti létt félaginu fjárhaginn á komandi árum. Þá segir í skýrslunni að ekki sé annað hægt en að horfa björtum augum fram á komandi ár og stjórn félagsins muni kappkosta við að halda útgjöldum félagsins innan skynsamra marka.