Fimmtudaginn 23. febrúar verður almennur íbúafundur haldinn í Snæfellsbæ. Dagskrá fundarins hefst með því að fjárhagsáætlun bæjarsjóðs verður kynnt en eftir umræður um hana munu fundargestir velja sér umræðuhópa sem einkum fjalla um tvö meginmál, þ.e. íþróttir og æskulýðsmál annars vegar og öldrunarmál hins vegar. “Eftir að við höfum kynnt fjárhagsáætlunina og umræðum um hana lýkur munu bæjarfulltrúar og bæjarstjóri draga sig í hlé en hlusta á skoðanir fólksins án þess að taka þátt í umræðunum. Með því móti vonumst við til að sem flestir tjái sig. Kallað verður eftir hugmyndum íbúa og ábendingum um það sem brennur á fólki og er ég viss um að margt áhugavert mun koma fram. Við viljum hafa fundinn eins lýðræðislegan og kostur er og vonumst til að íbúar mæti og taki virkan þátt í líflegum hugarflugsumræðum,” sagði Kristinn Jónasson, bæjarstjóri í samtali við Skessuhorn.

Fundurinn verður eins og áður segir haldinn annan fimmtudag, 23. febrúar í Klifi og hefst hann klukkan 20.