20. febrúar. 2006 12:05
Samkvæmt upplýsingum frá Fasteignamati ríkisins fjölgaði skráðum sumarbústöðum á Vesturlandi um 7% milli áranna 2004 og 2005. Þann 31. desember sl. voru skráðir bústaðir 2872 á Vesturlandi, en í árslok 2004 voru þeir 2683 talsins, þannig að alls hafa 189 bústaðir verið byggðir á árinu. Af einstökum sveitarfélögum í landshlutanum eru flestir bústaðir nú skráðir í Borgarbyggð, eða 1049 og hafði þeim fjölgað um 52 á árinu. Í Skorradalshreppi eru nú 597 sumarbústaðir og fjölgaði um 39 árið 2005. Í Hvalfjarðarstrandarhreppi fjölgaði bústöðum um 42 á liðnu ári, eru nú 419 talsins og í Borgarfjarðarsveit eru nú 312 bústaðir, fjölgaði um 27 á liðnu ári.
Fasteignamat sumarbústaða á Vesturlandi var árið 2004 9,6 milljarðar króna og hefur það aukist um hvorki meira né minna en 45,8% milli ára, er nú rétt tæpir 14 milljarðar króna. Eins og áður hefur verið sagt frá í Skessuhorni hækkaði fasteignamat sumarbústaða á Vesturlandi mikið sl. haust. Miðað við að bæði kemur til hækkað fasteignamat sumarbústaða og mikil fjölgun bygginga geta því sveitarfélög þar sem flestir sumarbústaðir eru til staðar reiknað með gríðarlegum tekjuauka af fasteignagjöldum á þessu ári.