18. apríl. 2006 06:05
Svo virðist sem mikið kapphlaup sé framundan í byggingu reiðhalla eða reiðskemma víðs vegar um land í kjölfar ákvörðunar ríkisstjórnarinnar um styrk til byggingar slíkra húsa í öllum landshlutum. Eins og fram kemur í fréttinni hér á undan hefur bæjarstjórn Grundarfjarðar samþykkt stuðning við slíka byggingu þar í bæ og í síðustu viku samþykkti bæjarráð Stykkishólms styrk við slíka byggingu í kjölfar erindis frá Hestamannafélagi Stykkishólms (HEFST).
Í samþykktinni segir að styrkur verði veittur að fjárhæð 15 milljónir króna til byggingar á reiðskemmu á svæði félagsins við Fákaborg. Í þeirri fjárhæð eru gatnagerðargjöld innifalin. Bæjarfélagið setur nokkur skilyrði fyrir styrkveitingunni meðal annars að styrkur að upphæð 10 milljónir króna komi til byggingarinnar frá Landbúnaðarráðuneytinu og aðrar fjármögnunarleiðir skili 5 milljónum króna. Styrkur bæjarins verður greiddur með jöfnum greiðslum á fimm árum frá árinu 2007.