08. nóvember. 2006 12:30
Landmælingar Íslands á Akranesi (LMÍ) munu á næstu vikum selja lager prentaðra korta og geisladiska stofnunarinnar sem og nokkra útgáfugrunna vinsælla ferðakorta. Þetta er gert í samræmi við ný lög um stofnunina sem samþykkt voru í vor og taka gildi um næstu áramót. Hin nýju lög voru sett á sínum tíma meðal annars vegna árekstra milli einkafyrirtækja og stofnunarinnar sem leiddu til kvartana til samkeppnisyfirvalda.
Magnús Guðmundsson forstjóri LMÍ segir að stofnunin hafi undanfarin misseri undirbúið þær breytingar sem verða á rekstrinum um næstu áramót. Þær hafa meðal annars leitt til þess að starfsmönnum hefur fækkað og eru þeir nú 28 talsins, en ekki er gert ráð fyrir að um frekari fækkun verði að ræða. Starfssvið nokkurra núverandi starfsmanna breytist þegar sala og dreifing korta hættir.
Talsverður tekjumissir
Sala prentaðra korta og geisladiska hefur fært LMÍ um 25-30 milljónir króna í tekjur á ári. Aðspurður hvernig stofnuninni verður bættur tekjumissirinn segir Magnús að það sé aðeins að hluta til gert í fjárlagafrumvarpinu fyrir árið 2007, en einnig sé málið til skoðunar í umhverfisráðuneytinu , en niðurstaða liggi ekki fyrir.
Tveir aðilar eru langstærstir í prentun og sölu landakorta á Íslandi, en það eru LMÍ og Edda útgáfa hf. Aðspurður hvort einhverjar skorður verði settar við sölu útgáfugrunna LMÍ til þess að tryggja samkeppni í prentun og sölu segir Magnús svo ekki vera. Útgáfugrunnarnir verði seldir hæstbjóðanda en salan fari þó þannig fram að hægt verði að bjóða í einstakar útgáfur. Um mögulegt söluverð vildi Magnús ekki tjá sig.
Samkeppni ekki tryggð
Aðspurður hvort einhverjar kvaðir verði lagðar þeim á hendur sem kaupa lager prentaðra korta LMÍ um framboð og aðgengi vörunnar í framtíðinni segir Magnús svo ekki vera. Hann segir að í raun hafi aðeins vinsælustu kortin staðið undir kostnaði en önnur kort hafi verið niðurgreidd af almannafé. Því sé það hverjum kaupanda í sjálfsvald sett hvað hann gerir við þann lager sem hann festir kaup á.
Stofnunin ekki eins sýnileg
Við brotthvarf LMÍ af þessum markaði verður stofnunin ekki eins sýnileg og áður. Magnús segir að stofnunin muni eftir sem áður tryggja að „ávallt séu til staðfræðilegar og landfræðilegar grunnupplýsingar um Ísland“ eins og segir í lögum um stofnunina. Í nýju lögunum er nýmæli þar sem segir að stofnunin skuli eiga faglegt samstarf við háskóla, stofnanir, fyrirtæki og alþjóðlega samtök í samræmi við verkefni hennar. Magnús segir að í þessu geti falist mörg spennandi verkefni og meðal annars hafi viðræður átt sér stað að undanförnu við fleiri en einn háskóla hér á landi um mögleg samstarfsverkefni.