22. nóvember. 2006 08:00
 |
| Guðmundur Gunnarsson og Björn Jónsson sem um árabil störfuðu í síldarverksmiðjunni. Myndir: Myndsmiðjan |
Á annað þúsund manns sótti sýningu í Haraldarhúsi á Akranesi um helgina. Eins og fram hefur komið í Skessuhorni var sýningin opuð 17. nóvember í tilefni þess að þá voru 100 ár liðin frá því að Haraldur Böðvarsson hóf atvinnurekstur á Akranesi. Það er sonarsonur hans, Haraldur Sturlaugsson, sem á veg og vanda af uppsetningu sýningarinnar í húsi því sem Haraldur Böðvarsson hóf að reisa árið 1924 við Vesturgötu 32.
 |
| Lóa Gísladóttir, Sigríður Guðjónsdóttir og Áslaug Valdimarsdóttir störfuðu allar á sínum tíma í frystihúsinu |
Á afmælisdaginn sjálfan komu saman um tvöhundruð núverandi og fyrrverandi starfsmenn fyrirtækja Haraldar Böðvarssonar saman til samkomu í Bíóhöllinni. Þar horfðu gestir á kvikmynd úr starfi fyrirtækisins og einnig skemmtu Álftagerðisbræður gestum. Að samkomunni lokinni þáðu gestir veitingar í Haraldarhúsi um leið og þeir skoðuðu sýninguna.
 |
| Elín Hannesdóttir, Þorsteinn Þorvaldsson, Bergþór Guðmundsson, Eðvarð Ingólfsson og Helgi Daníelsson |
Á laugardag og sunnudag var sýningin opin almenningi og var hún fjölsótt. Að sögn Haraldar Sturlaugssonar komu sóttu ríflega þúsund manns sýninguna og segist hann mjög ánægður með þann áhuga. Hann segir þar bæði hafa ráðið áhugi fólks á atvinnurekstrinum og einnig hafi margir haft áhuga á að skoða húsið sjálft.