23. nóvember. 2006 11:50
Guðjón Arnar Kristjánsson fulltrúi Frjálslynda flokksins í fjárlaganefnd Alþingis segir ríkisstjórnina vera að senda kolröng skilaboð til stjórnenda ríkisfyrirtækja þegar ekki sé brugðist við rekstrarhalla Sjúkrahússins og heilsugæslustöðvarinnar á Akranesi (SHA) með auknum fjárframlögum. Eins og fram kom í frétt Skessuhorns í morgun undirbúa stjórnendur SHA mikinn niðurskurð í starfsemi stofnunarinnar vegna hallareksturs hennar.
Guðjón Arnar segir að á undanförnum árum hafi rekstur SHA gengið vel og stofnunin hlotið lof stjórnvalda. Vegna hagkvæms reksturs hafi verkefnum hennar fjölgað sem eðlilegt sé að hans mati. Nefnir hann sem dæmi fjölgun liðskiptiaðgerða og fjölgun fæðinga. Fjölgun aðgerða kalli hins vegar á aukið rekstrarframlag ríkisins enda sé hagkvæmt að beina verkefnum til þeirra stofnana sem hagkvæmast eru reknar. Því séu skilaboð ríkisstjórnarinnar til stjórnenda SHA nú með öllu óskiljanleg. „Stofnun sem verið hefur til fyrirmyndar í sínum rekstri er nú skilin eftir í halla sem myndast vegna góðrar frammistöðu starfsfólks hennar. Það sjá það allir sem vilja sjá að þetta getur ekki gengið og má ekki verða niðurstaðan. Með því er verið að letja stjórnendur ríkisfyrirtækja til þess að ná góðum árangri í sínum rekstri.“
Guðjón segir að málefni SHA hafa verið til umræðu í fjárlaganefnd Alþingis og hann hafi beitt sér fyrir því að framkvæmdastjóri hennar hafi verið boðaður á fund nefndarinnar en því miður hafi meirihluti nefndarinnar talið þörf á að rétta hlut stofnunarinnar þrátt fyrir góðan árangur í rekstri. „Það er hörmulegt að þeir sem vel standa sig skuli fá þau skilaboð að skera þurfi niður.“
Aðspurður hvort minnihluti fjárlaganefndar muni leggja fram breytingartillögur við fjáraukalög og fjárlagafrumvarpið segir Guðjón Arnar að reglan sé sú að allar breyingartillögur minnihluta séu felldar og því muni ekki verða lagðar fram breytingartillögur við einstaka liði frumvarpanna. „Við munum hins vegar leggja áherslu á velferðarmálin í heild í okkar málflutningi.“