23. febrúar. 2007 10:39
Hvergi á landinu hækkaði fermetraverð íbúðarhúsnæðis jafn mikið og á Vesturlandi á árunum 1990-2006 eða um 327%. Þetta kemur fram í samantekt Fasteignamats ríkisins um verðþróun íbúðarhúsnæðis eftir landshlutum frá 1990. Fermetraverðið á Vesturlandi tekur hækkunum á öllu þessu tímabili nema á milli áranna 1994 og 1995 þegar verðið lækkar lítilsháttar. Framan af þessu tímabili er hækkunin á milli ára frá rúmum 2% til rúmlega 9%. Frá árinu 2001 hefur verið síðan tekið stórstígum hækkunum. Má þar nefna að milli áranna 2004 og 2005 hækkaði fermetraverðið um 22,3% og á milli áranna 2005 og 2006 hækkaði verðið um tæp 23%.
Eins og áður sagði hefur fermetraverð í einstökum landshlutum hvergi hækkað jafn mikið og á Vesturlandi frá árinu 1990 þar sem það hækkaði um 327%. Á höfuðborgarsvæðinu hækkaði verðið um 266%, á Reykjanesi hækkaði verðið um 237%, á Vestfjörðum hækkaði verðið aðeins um 80% á þessum árum, á Norðurlandi vestra var hækkunin 130%, á Norðurlandi eystra 235%, á Austurlandi 231% og á Suðurlandi 256%.