27. febrúar. 2007 02:40
Nauðsynlegt er að bæta vegamót í Hvalfjarðarsveit að mati Smára Ólafssonar umferðar- og samgönguverkfræðings hjá VSÓ ráðgjöf ehf. en hann vann skýrslu að beiðni sveitarstjórnar Hvalfjarðarsveitar. Smári gerði úttekt á sjö vegamótum og þar af eru sex þeirra við þjóðveg nr. 1. Úttektin var gerð með tilliti til slysatíðni, athugasemda við vegamótin og þróun umferðar. Á sumum þessara gatnamóta hafa orðið alvarleg slys á liðnum árum enda hefur umferð farið hratt vaxandi ásamt því að umferðarhraði hefur aukist.
Á fimm þessara vegamóta leggur Skúli til að hugað verði að gerð hringtorga eða hringtorg stækkað eins og hringtorgið við Hvalfjarðargöng. Á tveimur vegamótanna er lagt til að lögð verði áhersla á að aðskilja akstursstefnur og bæta umhverfi vegarins.
Einar Örn Thorlacius sveitarstjóri Hvalfjarðarsveitar segir að þrátt fyrir að úrbætur á vegamótum á stofnbrautum séu ekki í verkahring sveitarfélaga þá hafi sveitarstjórn Hvalfjarðarsveitar ákveðið á síðasta ári að kosta því til að fá verkfræðistofu til að taka út nokkur slík sem heimamenn hafi talið sérlega hættuleg fyrir vegfarendur. Hann segir að Magnús Valur Jóhannsson svæðisstjóri Vegagerðarinnar í Borgarnesi hafi fengið skýrsluna afhenta og hann hafi tekið henni vel.