15. júní. 2007 07:45
Vesturlandsdeild ferðaklúbbsins 4x4 fór sína árlegu jeppaferð á 19 bílum með skjólstæðinga svæðisskrifstofu málefna fatlaðra á Vesturlandi sl. laugardag. Farið var frá Akranesi klukkan 10 áleiðis í Hyrnuna í Borgarnesi, þar sem fleiri bílar bættust með í för. Með öllum fór því 47 manna hópur skjólstæðinga og aðstoðarmanna þeirra auk ökumanna. Farið var inn Skorradal og yfir Geldingardraga um Svínadal og yfir í Hvalfjörð. Þar nutu ferðalangar aðstoðar staðkunnugra einstaklinga þegar komið var að því að þekkja alla bæina, fjöllin og vötnin sem á leiðinni voru, en samskipti fóru öll fram um sameiginlega rás á talstöðvum bílanna. Í Hvalfirði var stoppað við Hvalstöðina til að skoða gömlu vinnslustöðina. Eftirminnileg lygtin á svæðinu bar vitni um vinnslu þar síðastliðið haust.
Veðrið var frábært í ferðinni, eða15 stiga hiti, logn en sólarlaust var framan af degi. Hvalfjörðurinn var spegilsléttur og skartaði sínu fegursta. Úr Hvalfirði var ekið upp Kjósarskarð að Þingvöllum og niður Grafning og stoppað á Nesjavöllum. Í boði Orkuveitan Reykjavíkur var virkjunin skoðuð og lýst fyrir gestunum hvernig rafmagnið lýsir okkur veginn og heita vatnið kemst til neytenda. Orkuveitan bauð svo öllum í mat í Nesbúð að skoðunarferð lokinni og er fyrirtækinu þakkað kærlega fyrir það.
Frá Nesjavöllum var ekið svokallaðan Pípuveg niður að Hafravatni og í Mosfellsbæ. Ferðin endaði svo á upphafstað um fjögurleytið.
Eins og áður var sagt, fóru öll samskipti fram í talstöðinni; leiðarlýsing, sagðir voru brandarar, vísur og fleira og var gleðin svo sannarlega allsráðandi. Við þökkum öllum ferðafélögum fyrir frábæran dag í góðu veðri. Björgunarfélagi Akranes þökkum við einnig en félagið lánaði okkur einn af bílum sínum til fararinnar.
Með sumarkveðjum,
Karl Ingi Sveinsson
Vesturlandsdeild ferðaklúbbsins 4x4
(Ljósm: Sigurbjörn Hafsteinsson).