Sveitarstjórn Hvalfjarðarsveitar hefur frestað ákvörðun um nýtt byggðarmerki, en fyrirhugað var að samþykkja það á fundi í síðustu viku. Líkt og Skessuhorn hefur greint frá hefur komið fram töluverð óánægja með merkið, ekki síst þá staðreynd að í því er kross. Einar Örn Thorlacius, sveitarstjóri, sagði í samtali við blaðamann að ákveðið hefði verið að kalla dómnefnd saman að nýju í ljósi framkomna athugasemda. Hann tók það fram að sjálfur hefði hann ekki verið á fundi sveitarstjórnar þar sem ákvörðunin um frestunina var tekin. „Menn vildu hins vegar gera þetta svona og fara yfir þær athugasemdir sem fram hafa komið frekar en að keyra þetta í gegn í einhverju offorsi.“