26. júlí. 2007 02:15
Gísli Gíslason formaður stjórnar Spalar telur að hægt verði að opna ný Hvalfjarðargöng árið 2011. Starfshópur fyrirtækisins og Vegagerðarinnar hefur undanfarið fundað um málið og gera hugmyndir hans ráð fyrir öðrum göngum við hlið þeirra sem nú eru. Önnur göngin yrðu fyrir norðurleiðina, hin fyrir suðurleiðina. Starfshópurinn vinnur að því að ýta áfram nauðsynlegum undirbúningsverkefnum sem eru forsenda þess að hægt sé að fara af stað, svo sem skipulagi, umhverfismati, landamálum o.fl. Gísli segir að verði vel haldið á spilunum geti þeim undirbúningi lokið að meginhluta í lok næsta árs. „Þegar því er lokið tekur við hönnunarferli og síðan að hella sér út í sjálfa framkvæmdina. Við vitum það af fyrri reynslu að verkefnið sjálft, að gera göng eins og Hvalfjarðargöng tekur rétt tæplega tvö ár. Ég er bjartsýnn maður og leyfi mér að vona að göngin gætu verið tilbúin árið 2011.“
Vegagerðin gerir ráð fyrir því að miðað við umferðaraukningu verði tvöföld göng nauðsynleg árin 2013/14. Spölur telur hins vegar að aukningin sé það mikil að ekkert verði því til fyristöðu að göngin verði að veruleika árið 2011. Gísli segir menn búa að rannsóknum við þau göng sem nú eru í notkun. Gríðarlegt magn sé til af upplýsingum um jarðlög og fleira sem nýtist við framkvæmdina.