Að kröfu þriggja bæjarfulltrúa minnihlutans hefur verið boðað til aukafundar í bæjarstjórn Akraness á morgun, laugardag. Þau Guðni Tryggvason, Rún Halldórsdótir og Hrönn Ríkharðsdóttir lögðu fram bókun á bæjarráðsfundi þann 17. júlí vegna afgreiðslu á samkomulagi Akraneskaupstaðar við Kalmansvík ehf. og kröfðust þess að haldinn yrði aukafundur í bæjarstjórn. Líkt og Skessuhorn hefur greint frá gerði Akraneskaupstaður samkomulag við Kalmansvík ehf. þann 12. júní, um útfærslu á skipulagi á sjö hektara landi í Kalmansvík. Þar er áætlað er að reisa allt að 450 íbúðir fyrir 50 ára og eldri. Bæjarfulltrúar minnihlutans mótmæltu því samkomulagi og sögðu m.a. í bókun að ekki væri góð stjórnsýsla að fulltrúar Akraness ynnu að skipulaginu án undangenginnar efnislegrar umræðu innan bæjarstjórnar ásamt faglegri umsögn skipulagsnefndar. Aukafundur bæjarstjórnar verður eins og áður segir á morgun og hefst hann klukkan 11 í bæjarþingsalnum.