31. júlí. 2007 02:02
Bæjarráð Akraneskaupstaðar samþykkti á fundi sínum í dag að ganga til samninga við Gámaþjónustu Vesturlands um rekstur gámastöðvar á Akranesi. Líkt og Skessuhorn greindi frá var reksturinn boðinn út í sumar og sáu Ríkiskaup um útboðið. Þrjú tilboð bárust og var tilboð Íslandsgáma ehf. lægst, það hljóðaði upp á 1,5 milljónir króna. Gámaþjónusta Vesturlands bauð tæpar níu milljónir og Íslenska gámafélagið 12,4 milljónir. Tekið skal fram að hér er um að ræða þá upphæð sem bæjarfélagið þarf að greiða með rekstri gámastöðvarinnar árlega. Ríkiskaup mátu tilboð Íslandsgáma ótækt og að því bæri að vísa frá og mæltu með því að samið yrði við Gámaþjónustu Vesturlands.
Tilboðin voru kynnt á bæjarráðsfundi í gær og krafðist minnihlutinn þá lögfræðilegs álits á því hvort vanhöld á tilboði lægstbjóðanda væru svo stórvægileg að þau leiddu til þess að tilboðinu væri hafnað. Í lögfræðiáliti frá Landslögum, sem lagt var fram á öðrum fundi í dag, kemur fram að ýmis fylgigögn hafi vantað með tilboðinu. Það er því álit lögfræðings að vísa beri tilboði lægstbjóðenda frá og samþykkti meirihluti bæjarstjórnar það, sem og samninga við Gámaþjónustu Vesturlands eins og fyrr segir.
Minnihluti lagði á fundinum í gær fram bókun þar sem sú skoðun þeirra var áréttuð að leita bæri samstarfssamnings við byggðasamlagið Sorpu. Þá segir: „Við óttumst að bæjarbúar muni bera of stóran hluta af þeim kostnaði sem bæjarfélagið sparar með því tilboði sem hér er til afgreiðslu. Við lítum svo á að með aðild að Sorpu muni Akraneskaupstaður geta haft betri og markvissari stjórn á kostnaðarliðum.“ Í svari meirihlutans kemur fram að gjaldskrá verði sambærileg hjá Akraneskaupstað og er nú hjá Sorpu. Það sé því rangt að bæjarbúar þurfi að greiða meira hjá Gámu á Akranesi en ef Akraneskaupstaður hefði sameinað Gámu við Sorpu.
Á seinni fundi bæjarráðs í dag var lagt fram minnisblað frá Þorvaldi Vestmann, sviðstjóra tækni- og umhverfissviðs. Að mati Þorvaldar getur árlegur ávinningur kaupstaðarins af verksamningi við Gámaþjónustu Vesturlands verið 25-35 milljónir miðað við núverandi rekstur Gámu.