23. nóvember. 2007 11:25
 |
| Úr Reykholtsdal |
Á þriðjudag í síðustu viku var haldinn í Logalandi almennur fundur um neysluvatnsmál í Reykholtsdal. Þar kynntu fulltrúar Orkuveitu Reykjavíkur, þeir Jakob S Friðriksson og Hreinn Frímannsson, stöðu mála í neysluvatnsmálum fyrir íbúa svæðisins. Á fjórða tug íbúa mætti á fundinn og má því marka mikinn áhuga almennings á úrbótum í neysluvatnsmálum enda er víða á þessum slóðum skortur á því. Þeir Jakob og Hreinn gerðu grein fyrir því hvers vegna fallið var frá Rauðsgilsveitu og skýrðu frá því að hönnun væri hafin á nýrri veitu þar sem vatni verður veitt úr Grábrókarveitu upp Stafholtstungur og þaðan í Reykholtsdal.
Hinsvegar fannst í sumar vatn við borun í landi Birkihlíðar í Reykholtsdal. Áður en hafist verður handa við áðurnefnda framkvæmd, verður athugað hvort nægjanlegt vatn sé í Birkihlíð og hvort gæði þess séu góð. Ef svo reynist vera er líklegt að sá kostur sé vænlegri heldur en að veita vatninu alla leið frá Grábrókarveitu. Niðurstöður rannsóknar á vatninu í Birkihlíð munu liggja fyrir snemma árs 2008.