02. desember. 2007 06:17
Stórmeistarinn Henrik Danielsen sigraði á sjötta Ottósmótinu sem fram fór í félagsheimilinu í Klifi í Ólafsvík um helgina. Henrik varð jafn Jóni Viktori Gunnarssyni og afmælisbarninu Sigurbirni Björnssyni, en hafði betur í aukakeppni. Guðfríður Lilja Grétarsdóttir sigraði í kvennaflokki, Eiríkur Örn Brynjarsson í unglingaflokki, Daði Ómarsson í flokki skákmanna með minna en 2000 skákstig og Sigurður Örn Scheving í flokki heimamanna. Auk þess voru veitt fjölmörg aukaverðlaun og meðal annars var dregið í happdrætti þar sem boðið var upp á gistingu og kvöldverð á Hótel Búðum.
Mjög góða þátttaka var að venju á mótinu, eða 71 keppandi. Vegleg verðlaun eru jafnan á Ottósmótinu. Þá var ókeypis rútuferð frá Reykjavík með keppendur.
Sex ára keppandi
Það vakti mikla athygli á mótinu að ungur piltur, Gylfi Örvarsson 6 ára, tók þátt í mótinu. Er þetta fyrsta mót Gylfa, enda nýbyrjaður að tefla. Stóð hann sig vel og náði jafntefli við Gunnar Gunnarsson frá Ólafsvík og kom þannig í veg fyrir að Gunnar yrði efstur heimamanna. Í sinni fyrstu skák á mótinu réðist Gylfi ekki á garðinn þar sem hann var lægstur, því engin önnur en forseti Skáksambands Íslands, Guðfríður Lilja Grétarsdóttir, settist á móti honum. Mátti forsetinn hafa sig alla við að vinna skákina. Sagði Guðfríður Lilja í samtali við Skessuhorn að þetta hafi verið hörkuskák og Gylfi hafi komið henni á óvart með skemmtilegum leikfléttum. “Það er gaman að sjá svona ungt fólk hafa áhuga á taflmennsku og er Gylfi gríðarlegt efni. Tíminn vinnur með honum enda ungur að árum,“ sagði Guðfríður Lilja.
Að launum hlaut Gylfi vegleg verðlaun fyrir að vera yngsti keppandinn í mótinu.
Á efri myndinni eru efstu menn á mótinu ásamt stjórnarmönnum Taflfélags Snæfellsbæjar.
Á neðri myndinni er Gylfi að þakka Guðfríði Lilju, forseta Skáksambandsins fyrir skákina.