04. desember. 2007 04:17
Síðastliðinn föstudag kom slökkviliðsstjóri Borgarbyggðar Bjarni Kr. Þorsteinsson með nýjan slökkvibíl sveitarfélagsins í Borgarnes. Bíllinn verður útbúinn öllum nýjasta búnaði sem völ er á. Byggðaráð samþykkti á síðasta fundi sínum að kaupa viðbótar búnað í bílinn fyrir rúmar tvær milljónir. Að sögn Bjarna slökkviliðsstjóra má líkja bílnum við hús sem á eftir að kaupa húsgögn inn í, því var þörf á viðbótarbúnaði. „Byggðin í Borgarbyggð á eftir að þéttast meira og íbúum að fjölga. Að mínu mati er þessi bíll bara fyrsta skrefið á langri vegferð í að byggja upp slökkviliðið tækjalega.
Öryggismál þurfa að vera í lagi, ekki síður en heilsugæslan, skólar, dagvistun og annað,“ sagði Bjarni og bætti við að vonandi yrði bíllinn tilbúinn til útkalls um miðjan desember og þá formlega afhentur.
Bíllinn er með 450 hestafla vél, háþrýstislöngukefli af nýrri gerð, sérstakan froðublandara á háþrýsting, 6 tonna rafmagnsspil að framan og dæluinntök fyrir utan dæluskáp svo eitthvað sé nefnt. Heildar burðargeta bifreiðarinnar er 17 tonn sem einnig er með sídrifi, háu og lágu drifi, læsingum og fleiru.