01. febrúar. 2008 05:54
Í dag var blásið til veislu í nýja skólahúsi Menntaskóla Borgarfjarðar í Borgarnesi þar sem m.a. Þorgerður Katrín Gunnarsdóttir, menntamálaráðherra var viðstödd, sem og fulltrúar helstu stuðningsaðila skólans; Símans, Apple umboðsins, Sparisjóðs Mýrasýslu, Borgarbyggðar auk starfsfólks, nemenda og annarra gesta. Það ber e.t.v. vott um hversu framkvæmdir hafa gengið hratt fyrir sig að innflutningur í húsið átti sér stað réttu ári eftir að fyrsti starfsmaður skólans var ráðinn til að móta hugmyndavinnu og undirbúa starfið, en það var Ársæll Guðmundsson skólameistari sem hóf störf sem slíkur 1. febrúar árið 2007. Mjög létt og skemmtilegt stemning ríkti á staðnum og ljóst að allir fögnuðu mjög þeim áfanga að nú væri skólahald flutt í nýja húsið.
Borgfirðingar eignast menningarhús
Engu hefur verið til sparað í hönnun og efnisvali skólabyggingarinnar og þar er í senn hátt til lofts og vítt til veggja. En húsnæði nýja menntaskólans verður ekki nýtt einungis til hefðbundins skólahalds. Þar er m.a. fjölnota menningarsalur sem hýst getur margþætta starfsemi hvort heldur er til tónlistarflutnings, leiklistar, til veisluhalda eða hvers konar starfsemi. Rekstur salarins og veitingaþjónusta verður boðin út. Tvímælalaust eru Borgfirðingar þarna að eignast veglegt samkomuhús sem í senn bætir aðstöðu til menningarstarfsemi af ýmsum toga en ekki síður mun þessi aðstaða færa mun meira líf inn í húsakynni skólans en venja er til með sambærilegar skólabyggingar. Framkvæmdum við frágang samkomusalar var slegið á frest í haust og ákveðið að flýta sem mest frágangi við skólstofur, skrifstofur kennara og aðra nauðsynlega aðstöðu fyrir skólahald.
Borgarfjarðarbrúin heillandi tilraun
Við þessi tímamót í dag var skrifað undir samning milli menntaskólans og Símans um samstarf við þróun kennsluhátta með upplýsinga- og fjarskiptatækni að leiðarljósi. Allt skólahald byggist frá fyrsta degi upp á mikilli nýtingu tækni við miðlun kennsluefnis, fyrirlestra, verkefnavinnu og annars skólastarfs. Því hefur menntaskólinn leitað samstarfs við öflug fyrirtæki eins og Símann og Apple umboðið til að auðvelda ákveðna þróunarvinnu á þessu sviði.
Við þetta tækifæri flutti menntamálaráðherra ávarp. Þorgerður Katrín sagðist fagna þessum áfanga að flutt væri inn, en tíminn frá því að heimamenn í Borgarfirði vöktu máls á byggingu nýs skóla árið 2005 og þar til nú væri í raun mjög stuttur. “Það var strax ákveðið að byggja skóla sem hefði afgerandi sérstöðu svo sem á sviði upplýsingatækni. Þá er ekki síst mikilvæg sú sérstaða sem þetta hérað hefur og byggir á samfellu í skólastarfi; allt frá grunnskóla til háskóla, og kristallast í verkefninu Borgarfjarðarbrúnni. Gott samstarf háskólanna á Hvanneyri og á Bifröst sem og góðir grunnskólar í héraði munu styðja menntaskóla hér í Borgarnesi á margvíslegan hátt,” sagði Þorgerður Katrín og óskaði skólastarfi í Menntaskóla Borgarfjarðar allra heilla.
Svara þörfum margmiðlunarkynslóðarinnar
Ársæll Guðmundsson, skólameistari MB sagði í ávarpi sínu fagna þessum merka áfanga í uppbyggingu skólans og að dagurinn væri stór í lífi Borgfirðinga. “Það var farið bratt af stað þar sem ákefð, áræðni og vilji til að sýna frumkvæði leiddu menn áfram.” Hann sagði að allt of víða væri of lítil þróun í skólastarfi og aðlögun skólahalds þyrfti að taka mið af þeim veruleika sem við lifðum í hverju sinni og tæki mið af þörfum ungu kynslóðarinnar. “Nemendur dagsins í dag eru eins konar margmiðlunarkynslóð og til að sinna kröfum hennar og þörfum þarf skóli sem þessi að svara kalli tímans með því að aðlaga skólahaldið að þeim veruleika sem unga fólkið lifir í. Á því sviði ætlar Menntskóli Borgarfjarðar að vera í fararbroddi og að verða framsækinn. Staðnaður skóli er ekki góður skóli,” sagði Ársæll.
Á myndinni eru skólameistari, forstjóri Símans, menntamálaráðherra, aðstoðarskólameistari og fulltrúar sveitarstjórnar Borgarbyggðar á fremsta bekk við athöfnina í dag.