06. febrúar. 2008 03:35
Byggðaráð Borgarbyggðar skoraði í síðustu viku á Vegagerðina að moka mikilvægar stofnbrautir og tengivegi í sveitarfélaginu alla virka daga. Í samtali við Skessuhorn sagði Páll S. Brynjarsson sveitarstjóri að einkum væri verið að horfa til Borgarfjarðarbrautar sem er stofnbraut og mokuð fimm daga vikunnar, ekki á þriðjudögum og laugardögum samkvæmt snjómokstursplani Vegagerðarinnar.
„Einnig er vegurinn um Heydal aðeins mokaður tvo daga í viku, mánudaga og föstudaga og okkur finnst að þannig veg þurfi að moka oftar þar sem þetta er í raun varaleið ef Brattabrekka er ófær. Við erum búnir að senda Vegagerðinni erindi um þetta,“ sagði Páll.
Magnús V. Jóhannsson svæðisstjóri Vegagerðarinnar í Borgarnesi sagði að enn hefði erindi Borgarbyggðar ekki borist inn á borð hjá sér en sjálfsagt væri að ræða málin. „Það er rétt að Borgarfjarðarbraut er ennþá á fimm daga kerfi sem samt er framför frá því sem var. Hins vegar er svokölluð helmingaskiptaregla í gangi varðandi snjómokstur á tengivegum. Þar borga sveitarfélögin helming á móti Vegagerðinni. Ef auka á mokstur á þeim vegum verður frumkvæðið alfarið að vera hjá sveitarfélaginu en samt er hámark á því hversu mikið væri hægt að auka við.“ Aðspurður sagi Magnús að reynt væri að standa við snjómokstursáætlunina en hann vissi ekki hvort mikilla breytingar væri að vænta á henni.
Athygli vekur þegar títtnefnd snjómokstursáætlun er skoðuð að æði misjafnlega er því skipt niður hversu oft og hvaða daga er mokað. Sem dæmi er Hálsasveitarvegur frá Reykholti að Húsafelli í Borgarfirði aðeins mokaður tvisvar í viku og þá á föstudögum og sunnudögum og er sá vegur ekki fjallvegur. Heimamenn segja þetta gert til að ferðamenn komist í og úr bústöðum sínum í Húsafelli. Lítið sé verið að spá í að þeir þurfi að komast um á virkum dögum, hvort sem er til vinnu eða aðdrátta. Laxárdalur og Laxárdalsheiði er mokuð þrisvar í viku og eins og áður segir er Heydalur mokaður tvisvar í viku.