27. febrúar. 2008 03:05
Hin árlega stærðfræðikeppni grunnskólanna á Vesturlandi sem Fjölbrautaskóli Vesturlands á Akranesi stendur fyrir er í gangi í dag. Nemendur úr fjölmörgum skólum streymdu á Akranes til að taka þátt í keppninni sem fer fram í húsakynnum fjölbrautaskólans.
Bjarnþór Kolbeinsson, deildarstjóri í stærðfræði, segir þátttökuna ekki eins mikla og á meðan flest var, en þá tóku yfir þrjúhundruð nemendur þátt í keppninni. Í dag eru þeir á annað hundrað. Að lokinni keppni býður Sparisjóðurinn á Akranesi upp á veitingar en sjóðurinn gefur einnig verðlaunin og greiðir allan kostnað við keppnishaldið. Það var mál þeirra nemenda sem blaðamaður Skessuhorns ræddi við fyrir keppni að það væri gaman að vera með og þar sem þetta væri ekki próf væri sjálfsagt að reyna sig við keppni eins og þessa.