Í síðustu viku heimsóttu þrír þáttargerðarmenn frá sjónvarpsstöðinni ProSieben í Þýskalandi tvö bú á Vesturlandi. Þangað fóru þeir til að taka upp heimildarþátt um ýmislegt sem tengist vinnslu á lamba- og kindakjöti. “Þeir höfðu sérstakan áhuga á því að taka myndir af íslensku sauðfé í sínu náttúrulega umhverfi, en einnig að fá upplýsingar um þjóðlegan íslenskan mat, sér í lagi Þorramat. Dagurinn endaði á því að slegið var upp heljarinnar veislu hér á Bjarteyjarsandi, með ekta íslenskum Þorramat – í byrjun júní! Þetta var heldur óvenjuleg lífsreynsla, en bara ánægjulegt að vera þátttakandi í þessu öllu saman,” sagði Arnheiður Hjörleifsdóttir á Bjarteyjarsandi í samtali við Skessuhorn.