12. júní. 2008 03:57
Lögreglan á Akranesi hefur sent frá sér tilkynningu um lok málsins frá í dag þegar ungum Akurnesingi var veitt eftirför á bifreið, hans leitað og síðan að endingu handtekinn. Þar segir að um klukkan 13 í dag hafi lögreglumenn frá Akranesi ætlað að stöðva bifreið til að kanna með ástand ökumanns. Þeir voru þá staddir við Hvalfjarðargöng og sá sem stöðva átti ók áleiðis til Reykjavíkur. Hann snéri bifreið sinni við er hann varð var við lögregluna og ók í átt til Akraness á miklum hraða. Bifreiðinni var veitt eftirför og náðist hraðamæling í eftirförinni þar sem ekið var með 180 km/klst hraða. Önnur lögreglubifreið frá Akranesi kom strax til aðstoðar og bifreið úr Borgarnesi auk bifhjóls úr höfuðborginni en þessir aðilar voru örskammt undan.
“Þegar sýnt var að ekki næðist að stöðva för bifreiðarinnar áður en hún kæmist inn á Akranes drógu lögreglumenn úr ökuhraða en sáu hvar bifreiðinni var ekið inn í bæinn og beygt til norðurs Esjubraut. Bifreiðin fannst svo mannlaus við Ægisbraut örskömmu síðar,” sagði Jón S Ólason yfirlögregluþjónn í samtali við Skessuhorn. Hann segir að lögregla hafi séð til ökumannsins hús á Ægisbraut og var ráðist til inngöngu í húsið eftir nokkra stund. Fóru sérsveitarmenn frá ríkislögreglustjóra á vettvang inn í húsið á undan almennum lögreglumönnum. Var það gert í öryggisskyni en umræddur maður hefur að undanförnu verið í brotastarfssemi og iðulega verið vopnaður við handtökur. Hann reyndist hins vegar ekki vera í húsnæðinu og var hafin leit að honum í bænum. Bar sú leit árangur og var maðurinn handtekinn um kl 14:30.
Tíu grömm af fíkniefnum fundust í vegkantinum skammt frá staðnum sem bifreiðin fannst og leikur grunar á því að maðurinn hafi kastað þeim út úr bifreiðinni. Hann gistir nú fangageymslur. Maðurinn er til viðbótar við framangreint grunaður um að hafa ekið bifreiðinni undir áhrifum fíkniefna.