Nemendur Varmalandsskóla og krakkar á leikskólanum á Varmalandi í Borgarfirði tóku sig til og mynduðu svokallaða vinakeðju nú í byrjun aðventu. Keðjan náði allt frá skólanum og upp á hamarinn fyrir ofan hann. Kyndlar voru látnir berast eftir keðjunni upp á topp og loguðu ljósin þar fram eftir degi.

Björg Ólafsdóttir deildarstjóri á yngri stigi í skólanum segir að nemendur bæði skólans og leikskólans hafi unnið með hugtakið virðingu í byrjun vetrar. “Nú tekur við vinna með vináttu. Tími aðventunnar er einmitt sé tími sem er góður í að hugleiða kærleik og vináttu. Það var því kærkomið tækifæri að nota þennan fyrsta virka dag aðventunnar til þess að búa til svokallaða vinakeðju úr nemendum skólanna. Þannig leiddust nemendur upp á fjall, einn úr eldri deild og annar úr yngri eða leikskólanum.” Björg segir að kyndlarnir hafi samtals verið 13 talsins, jafnmargir jólasveinunum þótt hugsunin hafi verið önnur.