12. desember. 2008 01:40
Magnús Ingi Helgason badmintonmeistari og íbúi í Hvalfjarðarsveit hækkar sig mikið á heimslistanum sem Alþjóða Badmintonsambandið gaf út í gær, fimmtudag. Í einliðaleik fór Magnús Ingi upp um 53 sæti milli vikna og er nú í 223. sæti. 16 liða úrslitin á írska mótinu um síðustu helgi gáfu Magnúsi mörg stig og er ástæða þessarar hækkunar. Í upphafi árs var Magnús 349. á heimslistanum og hefur því farið upp um 126 sæti á árinu. Landsliðsmennirnir Magnús Ingi Helgason og félagi hans Helgi Jóhannesson hafa stokkið upp listann að undanförnu, en aðrir íslenskir badmintonspilarar hafa ekki tekið þátt í alþjóðlegum mótum að undanförnu.
Tvíliðaleikurinn hjá þeim Magnúsi Inga og Helga hefur gengið vel í ár. Þeir eru nú í sæti 118 á heimslistanum en voru í 142. sæti í síðustu viku. Sigur þeirra á mótum í Slóvakíu og Kýpur gáfu mörg stig auk þess sem 16-liða úrslitin í Írlandi um síðustu helgi skiptu líka máli. Magnús Ingi og Helgi hafa nú sex mót á bakvið heimslistastöðu sína í tvíliðaleik.
Á heimsíðu badmintonsambandsins segir að til að heimslistinn gefi rétta mynd af getu þurfi tíu mót á bakvið árangur. Miðað við gengi þeirra Magnúsar og Helga að undanförnu ættu þeir að geta verið töluvert ofar á heimslistum með fleiri mótum. Helgi Jóhannesson er nú í 384.sætinu í einliðaleik og er það hækkun um níu sæti milli vikna.