13. desember. 2008 02:49
 |
Sigrún og Anna í Fífusundi á spjalli saman í gær. |
Sigrúnu Árnadóttur frá Kistufelli í Lundarreykjadal þekkja margir Borgfirðingar og aðrir þeir sem átt hafa leið um Hyrnutorg í Borgarnesi á síðustu árum. Þegar líður á vikuna kemur hún sér fyrir við söluborðið á gangi verslunarmiðstöðvarinnar og selur þar fyrir lítinn pening notaðar bækur. “Það eru margir sem láta mig hafa gömlu bækurnar frekar en að henda þeim. Þetta eru oft bækur úr dánarbúum eða bækur sem fólk þarf að afsetja þegar það t.d. flytur í minna húsnæði,” segir Sigrún. Hún selur bækurnar fyrir hóflegt verð og segist styðja góð málefni með því sem út úr sölunni fæst. Þá nýtir hún tímann og prjónar lopasokka og selur.
Sigrún segist mæta á staðinn á fimmtudagseftirmiðdögum og er svona þessa daga þegar umferðin er mest í Samkaup og aðrar verslanir í húsinu. En þetta er ekki það eina sem hún gerir meðan hún dvelur á staðnum. Samviskusamlega sækir hún innkaupakörfur og kemur þeim á sinn stað þegar fólk skilur þær eftir á göngunum. Þá tínir hún upp rusl og heldur anddyri verslunarinnar snyrtilegu. “Það er ágætt að hafa eitthvað verkefni þegar maður er kominn á þennan aldur. Hér hittir maður marga og spjallar og heldur tengslum við fólkið sitt,” segir Sigrún Árnadóttir.