18. desember. 2008 03:29
 |
Frá afhendingu styrks SPM í haust |
Nú á síðustu vikum hefur hópur stuðningsmanna körfuboltans í Borgarnesi verið að safna til stuðnings á kaupum erlendra leikmanna til liðsins og hefur það gengið alveg frábærlega. Vonast stjórn og leikmenn til að nú líti betur út með restina af tímabilinu en af er. Meiðsli hafa gert okkur lífið leitt í haust og hafa menn eins og Pálmi Sævars, Óðinn, Finnur, Áskell og Hafþór verið mikið frá en útlitið er bjartara eftir áramót því þá munu strax í janúar mæta Hafþór og Áskell og vonandi Óðinn. Óvíst er hvenær Pálmi og Finnur geta byrjað á fullu. Yfirleitt hafa styrktaraðilar staðið sig vel í haust, nokkrir hafa aðeins lækkað styrkina vegna kreppu en flestir halda sínu striki og sumir meira að segja hækka sig og er það geysilega mikils virði fyrir rekstur deildarinnar. Mjög stórir styrktaraðilar eru t.d. Sparisjóður Mýrasýslu, Borgarverk, Borgarbyggð, Samkaup, Norðurál, BM-Vallá, Húsasmiðjan, Kaupfélag Borgfirðinga og lögfræðistofa Inga Tryggvasonar.
Körfuknattleiksdeildin og Sparisjóðurinn gerðu með sér risa samning í haust og er hann sá lang stærsti sem ég hef komið nærri. SPM mun styrkja deildina um verulega góðar fjárhæðir sem eru greiddar þrisvar sinnum yfir tímabilið og nær samningurinn til tveggja tímabila það er yfirstandandi tímabil og það næsta. Það er ósk og von okkar sem í stjórn körfuknattleiksdeildarinnar sitja að Borgfirðingar taki nú höndum saman og haldi áfram að mæta á leiki, barna, kvenna og karla og styðji þannig við sitt lið. Við þurfum svo sannarlega á því að halda núna. Einnig er það mín skoðun að við ættum öll að vera dugleg við að styða við bakhjarl okkar í 95 ár, Sparisjóð Mýrasýslu. Án hans væri lítið íþrótta- og tómstundalíf í Borgarbyggð.
Með kærri þökk og jólakveðju,
Hafsteinn Þórisson
Formaður körfuknattleiksdeildar Skallagríms