19. desember. 2008 02:55
 |
Guðbjörg Aðalbergsdóttir |
Menntamálaráðherra hefur skipað Guðbjörgu Aðalbergsdóttur skólameistara Fjölbrautaskóla Snæfellinga í nýtt starf skólameistara Framhaldsskólans í Mosfellsbæ. Skipun hennar er til fimm ára frá 15. janúar nk. Guðbjörg hættir því sem skólameistari FSN um miðjan janúar en starf skólameistara hefur verið auglýst laust til umsóknar með umsóknarfresti til 9. janúar en vonast er til að nýr skólameistari geti hafið störf 1. febrúar 2009. Guðbjörg hefur verið skólameistari Fjölbrautaskóla Snæfellinga allt frá stofnun hans haustið 2004. Þannig hefur hún unnið ákveðið frumkvöðlastarf, líkt og hún tekur nú að sér í nýjum framhaldsskóla í Mosfellsbæ. “Já, ég mun undirbúa stofnun nýs skóla í Mosfellsbæ sem fyrst í stað verður í bráðabirgðahúsnæði, í gömlu skólahúsi sem heitir Brúarland. Síðan verður byggt nýtt skólahús í miðbæ Mosfellsbæjar,” segir Guðbjörg sem kveðst verða viðloðandi í Grundarfirði fram í miðjan janúar.
“Mér hefur líkað mjög vel hér í Grundarfirði og er þakklát öllu samstarfsfólki mínu, nemendum og íbúum á Snæfellsnesi. Þetta hefur verið skemmtilegur tími og mjög gott samstarf verið við alla aðila hér í samfélögunum á Snæfellsnesi sem og á sunnaverðum Vestfjörðum þar sem skólinn starfrækir útibú. Alveg frá upphafi árið 2004 hefur verið góður og mikill stuðningur fólksins hér á Snæfellsnesi við skólann. Það var geysilega mikilvægt að allir stóðu saman af að byggja upp svona mikilvæga stofnun. Nú höfum við náð þeim árangri að um 80% af árgöngum nemenda héðan af Snæfellsnesi og sunnanverðum Vestfjörðum sækir nám í FSN. Það hefur gengið vel að undanförnu og aldrei svona margir nemendur verið skráðir í skólann, eða rúmlega 300 á haustönn. Þá gerum við ráð fyrir að um 260 nemendur verði í skólanum á vorönn,” segir Guðbjörg Aðalbergsdóttir að lokum.