08. janúar. 2009 11:05
 |
Gísli S Einarsson |
„Að mínu mati teflum við ekki djarft með því að gera ráð fyrir svipuðum tekjum á árinu og bæjarsjóður hafði á síðasta ári. Við erum með öflug fyrirtæki á Grundartanga, þar sem laun starfsmanna Elkem voru m.a. að hækka um 20%. Sjávarútvegurinn er ennþá öflugur á Skaganum og útlit fyrir að þar haldist atvinnan og launin uppi. Síðan eru stofnanir bæjarins og ýmiss önnur öflug fyrirtæki, þannig að við óttumst ekki tekjusamdrátt,“ segir Gísli S. Einarsson bæjarstjóri í tilefni þess að fyrri umræða um fjárhagsáætlun Akraneskaupstaðar fór fram á fundi bæjarstjórnar í síðustu viku, en stefnt er að afgreiðslu áætlunarinnar eftir seinni umræðu í lok mánaðarins.
Gísli segir að bæjarstjórnin sé samstíga í áætlunargerðinni og menn ætli að taka sér góðan tíma milli umræðna til að móta nauðsynlegar aðhaldsaðgerðir. „Við stöndum vel varðandi gatnagerð, eigum tilbúnar götur í Skógarhverfi II, þannig að væntanlega verða þær framkvæmdir í lágmarki á árinu. Hinsvegar höfum við mikinn hug á mannfrekum framkvæmdum og til að mynda eru á döfinni miklar framkvæmdir í skógræktinni í verkefni sem heitir „Viskubrunnur í álfalundi“ sem er alls upp á 60-70 milljónir króna.
Við munum engu að síður þurfa að grípa til niðurskurðar og takmarkana í ýmsu en fjárhagsáætlun verður sniðin að því meginmarkmiði að skerða ekki grunnþjónustuna. Við það verður staðið svo lengi sem mögulegt er og er það sagt fyrir hönd allrar bæjarstjórnar,“ segir Gísli.
Bæjarstjóri segir Akraneskaupstað standa að mörgu leyti betur en aðrir þéttbýlisstaðir, sem lýsir sér í því að geta á raunhæfan hátt gert ráð fyrir óskertum tekjum og þar af leiðandi staðið vörð um grunnþjónustuna. Hinsvegar sé ljóst að efnahagsástandið og miklar fjárskuldbindingar á síðustu misserum setji bæjarsjóð í þá þrönga stöðu að aukins lánsfjár verði að afla á árinu og þar með verði skuldsetning bæjarfélagsins aukin.