03. febrúar. 2009 01:05
Stjórn Sambands garðyrkjubænda (SG) samþykkti á fundi sínum síðastliðinn föstudag harðorða ályktun gegn þeirri ákvörðun ríkisins að auka rafmagnskostnað garðyrkjubænda um 25%. “Í lok desember óskaði ráðuneyti landbúnaðar eftir samningum við SG um að skerða niðurgreiðslur á dreifingarkostnaði rafmagns. Skerðingin skyldi vera 30% og því bætt við að fulltrúar SG hefðu í raun enga samningsstöðu í málinu. Sérfræðingur SG metur áhrif skerðingarinnar til 25% hækkunar á rafmagnskostnaði garðyrkjubænda. Rafmagn er annar stærsti útgjaldaliður garðyrkjubænda á eftir launum,” segir stjórn SG.
Forsaga málsins segja garðyrkjubændur vera þá að vegna breytinga á lögum um raforku árið 2005 gerði SG samning við ríkið um 95% niðurgreiðslu á kostnaði við dreifingu rafmagns. Fyrirséð var að lagasetningin myndi leiða til 30% hækkunar á rafmagnskostnaði garðyrkjubænda. Kostnaður ríkisins af þessum niðurgreiðslum jókst úr 100 milljónum króna í 210 milljónir á árunum 2005-2009. Fyrir því voru tvær ástæður: Notkun bænda og þar með framleiðsla jókst um sem nam 32 milljónum en 77 milljónir stöfuðu af gjaldskrárhækkunum raforkufyrirtækja sem eru í eigu ríkisins.
“Þessi hækkun raforkukostnaðar bætist ofan á þá ákvörðun sem ráðuneytið tilkynnti um í byrjun desember að skerða þyrfti vísitöluhækkun samnings um beingreiðslur til framleiðenda tómata, gúrku og papriku. Að mati stjórnarinnar leiðir sú ráðstöfunin til 2-3% skerðingu tekna. SG neitaði að fallast á slíka skerðingu og ber ríkisstjórnin því fulla ábyrgð á þeirri gjörð.
Stjórnin hefur verulegar áhyggjur af því að aðgerðir ríkisstjórnarinnar leiði til gjaldþrota meðal garðyrkjubænda verði ekkert að gert. Framleiðendur grænmetis og blóma geta ekki tekið á sig hækkun rafmangskostnaðar á sama tíma og tekjur þeirra eru skertar. Stjórnin SG krefst þess að ákvörðunum ráðuneytisins verði breytt og minnir í því sambandi á að aukin innlend framleiðsla hefur oft verið nefnd sem lausnin á yfirstandandi efnahagsvanda.”