13. febrúar. 2009 11:44
“Ég hef ákveðið að bjóða mig fram í 1.-2. sæti á framboðslista Sjálfstæðisflokksins í Norðvesturkjördæmi fyrir alþingiskosningarnar í vor,” segir Birna Lárusdóttir á Ísafirði í tilkynningu til fjölmiðla. Birna segir að nú séu viðsjárverðir tímar og staða þjóðarbúsins sé afleit. “Þeir sem eldri eru þekkja þrengingar af þessu tagi en kynslóðin mín á margt ólært. Þjóðin deilir um orsakir hrunsins en ljóst er að margir bera þunga ábyrgð. Þar þurfa stjórnmálaöfl að axla sinn hlut og gangast við þeim mistökum sem gerð hafa verið á liðnum árum. Flokkurinn minn er þar engin undantekning. Ég hef starfað að stjórnmálum undir merkjum Sjálfstæðisflokksins í rúman áratug, fyrst og fremst á sveitarstjórnarstiginu en einnig á landsvísu.”
Birna er 43 ára gömul, fædd og uppalin í Reykjavík en hef verið búsett á Ísafirði með hléum í 17 ár. Lauk stúdentsprófi frá Menntaskólanum við Sund og BA prófi í fjölmiðlafræði frá University of Washington í Seattle í Bandaríkjunum. Starfaði um nokkurra ára skeið sem fréttamaður Ríkisútvarpsins á Ísafirði og fréttaritari Rúv í Noregi. Hún hefur setið í bæjarstjórn Ísafjarðarbæjar frá 1998 og lengst af þeim tíma gegnt embætti forseta bæjarstjórnar. Hún er varaþingmaður Sjálfstæðisflokksins í NV-kjördæmi og skipar í dag 5. sæti listans. Eiginmaður hennar er Hallgrímur Kjartansson, læknir og eiga þau fjögur börn.