23. júní. 2009 02:01
 |
Höfnin á Arnarstapa |
Þrátt fyrir að miklar úrbætur hafi verið gerðar við Arnarstapahöfn á síðustu árum eru sjómenn sem gera þaðan út ekki alls kostar ánægðir. Eins og fram kom í sjómannadagsblaði Skessuhorns nýlega eru þeir til að mynda ekki ánægðir með festingar fyrir bátana sem ystir eru við bryggjuna og telja sig þar ekki trygga ef eitthvað er að veðri.
Bréf frá eigendum báta í Arnarstapahöfn var tekið fyrir á fundi bæjarstjórnar Snæfellsbæjar fyrir skömmu. Þar var óskað eftir endurbótum á höfninni. Af því tilefni samþykkti bæjarstjórnin eftirfarandi bókun: „Hafnarsjóður Snæfellsbæjar hefur á undanförnum árum lagt í mikinn kostnað vegna hafnarinnar á Arnarstapa og er hann að nálgast 150 milljónir króna.
Það sem gert hefur verið er m.a. að sjóvarnargarðurinn var allur endurnýjaður og lengdur, þannig að segja má að um nýja höfn sé að ræða. Allt svæðið innan hafnar var dýpkað þannig að bátar þyrftu ekki að sæta flóði og fjöru. Viðlegukanturinn var lengdur þannig að betur fari um bátana og nú er hægt að koma fyrir þremur röðum báta. Löndunarkraninn var endurnýjaður og uppsátrið lagfært. Aðkeyrslunni að höfninni var breytt mikið og vegurinn að höfninni steyptur og upplýstur. Skipt hefur verið um öll fríholt á bryggjunni og settir nýir stigar. Settir voru hringir innaná grjótgarðinn þannig að auðveldara er að binda bátana. Byggt var masturshús og allar vatns- og raflagnir endurnýjaðar. Svona mætti lengi telja. Eins og sést á upptalningunni hefur verið gert mikið í Arnarstapahöfn á undanförnum árum í þeim tilgangi að sem best fari um þá báta sem þar eru,“ segir í bókun bæjarstjórnar Snæfellsbæjar.