Jón Bjarnason sjávarútvegsráðherra undirritaði í gær reglugerð um strandveiðar og hefur hún þegar öðlast gildi sem lög. Eigendur smábáta geta gegn lágu gjaldi sótt um leyfi til strandveiða á heimasíðu Fiskistofu og hafa allmargar beiðnir borist nú þegar. Þau verða afgreidd í sömu röð og þau berast og er ekki loku fyrir það skotið að menn geti hafið veiðar næstkomandi sunnudag ef Fiskistofa úthlutar leyfum í dag. Strandveiðar verða einungis leyfðar sunnudaga til fimmtudaga. Strandveiðarnar eru frjálsar handfæraveiðar með allnokkrum takmörkunum. Mikill áhugi er fyrir veiðunum og er áætlað að allt að 350 smábátar muni stunda þær í þá tvo mánuði sem um ræðir í sumar.   Samkvæmt reglugerðinni eru leyfi til handfæraveiða bundin ýmsum fleiri skilyrðum. Má þar nefna að hver veiðiferð má ekki standa lengur en í 14 klukkustundir, menn þurfa að hafa fjareftirlitsbúnað um borð, einungis er leyfilegt að hafa handfærarúllur til veiðanna og mega ekki fleiri en fjórar rúllur vera í hverjum báti og hámarksafli í veiðiferð er 800 kíló af kvótabundnum fiski.