Ingvar framan við nýjustu íbúðirnar

Húsakosturinn sem áður tilheyrði sláturhúsi SS við Láxá í Leirársveit hefur á liðnum árum verið að taka miklum breytingum, en þar lagðist slátrun af eins og kunnugt er fyrir nokkrum árum síðan. Hjónin Ingvar Þ Gunnarsson og Hulda Hannibalsdóttir keyptu þá húsin og hafa nú byggt við og breytt húsakosti verulega. Vegfarendur um þjóðveginn hafa tekið eftir að þar er komin verslun auk þess sem sveitamarkaður er rekinn í húsinu um helgar á sumrin líkt og undanfarin ár. Þegar betur er að gáð sést að búið er að breyta húsunum og lagfæra þau mikið. Meðal annars er langt komið með að innrétta 12 leiguíbúðir í fyrrum fjárrétt og til stendur að breyta þeim hluta sem áður þjónaði hlutverki sláturhúss í veitingastað.