Þrotabú Loftorku í Borgarnesi ehf. hefur gengið að kauptilboði fimm lykilstarfsmanna og fyrrum eigenda Loftorku, Konráðs Andréssonar og fjölskyldu, í rekstur Loftorku Borgarnesi ehf. Óli Jón Gunnarsson framkvæmdastjóri sagðist í samtalið við Skessuhorn búast við að starfsemin verði komin á fullt aftur strax eftir helgi. „Vitaskuld er það léttir að samningar hafi tekist og starfsemin haldi áfram. Það var dapurlegt að horfa á þetta stöðvast og þar með eignir falla í verði,“ sagði Óli Jón.  Aðspurður sagði hann að núverandi starfsmenn Loftorku væru um 40 talsins. Hann segir að verkefnastaðan sé bærileg fram á haustið og að hluta til lengur, en fyrirtækið er í fjölþættri framleiðslu, á byggingaeiningum og holræsalögnum. Langstærsta verkefnið sem nú er á döfinni, er framleiðsla eininga í Tónlistarhúsið í Reykjavík.   Nýja félagið sem stofnað verður um Loftorku mun taka yfir öll verkefni og tæki gömlu Loftorku. Íslandsbanki mun hins vegar leysa fasteignir þrotabúsins til sín og leigja nýja félaginu.