22. júlí. 2009 08:02
Svo virðist sem heimsmarkaðsverð á áli fari hækkandi, ef marka má frétt á heimasíðu VLFA. Þar segir að álverð hafi 17. júlí síðastliðinn verið komið upp í 1635 dollara fyrir tonnið í stað 1300 dollara eins og það var í febrúar sl. þegar það var í sögulegu lágmarki. Hækkunin nemi því 26% á þessu tímabili. Þessar tölur var að finna á heimasíðu London Metal Exchange og eru nú reyndar komnar yfir 1700 dollara tonnið. Ástæðan fyrir því að þessu er varpað upp á heimasíðu verkalýðsfélagins er sú að eini kjarasamningurinn sem eftir er að semja um á þessu ári fyrir félagsmenn er við Norðurál, en sá kjarasamningur rennur út í árslok. Það hefur því aukist bjartsýni hjá samningafólki VLFA um að unnt sé að ná betri kjarasamningi en horfur voru á í vetur.
„Vissulega eru blikur á lofti varðandi álverð til lengri tíma, sérstaklega vegna birgðasöfnunar á heimsvísu, en Norðurál stendur vel að vígi hvað varðar sölu á áli því fyrirtækið hefur tryggt sölu á öllum sínum afurðum í það minnsta til ársins 2016. Það skiptir gríðarlega miklu máli að álverð haldi áfram að hækka, enda mun það gefa Verkalýðsfélagi Akraness byr undir báða vængi þegar að kemur að kjarasamningagerð fyrir starfsmenn Norðuráls,“ segir Vilhjálmur Birgisson á heimasíðu félagsins.