24. júlí. 2009 01:39
Félagarnir Einar Vilhjálmsson og Ómar Ragnarsson aka nú um helgina hringinn í kringum Ísland og hyggjast setja met með því að verða fyrstir til að fara hringveginn á metanbifreið sem knúin er með alíslensku metani. Lögðu þeir af stað frá Reykjavík í morgun en komu við í hádeginu í Skútunni á Akranesi. Með leiðangrinum vekja þeir athygli á þeim möguleikum sem felast í innlendri eldsneytisframleiðslu og metanbílum sem vistvænum og sparneytnum valkosti í samgöngum. Sá galli er á gjöf Njarðar að metanstöðvar eru einungis á höfuðborgarsvæðinu. Því hafa þeir birgðir af metani meðferðis í kerru og á palli Ford pickupbílsins sem valinn var til ferðarinnar.
Bifreið þeirra félaga var breytt í metanbíl af nemendum Borgarholtsskóla síðasta vetur. Bíllinn er með 210 hestafla vél. Þeir Ómar og Einar segja að mjög margir bensínbílar í dag séu framleiddir með það í huga að hægt sé að nota ýmist bensín eða metan á þá. Vandamálið sé að fleiri eldsneytisstöðvar vanti fyrir metanið. “Eitt helsta markmiðið með hringferðinni er að vekja athygli á sparnaðinum sem fylgir notkun metans. Hækkandi verð á hefðbundnu bifreiðaeldsneyti hefur vakið aukna athygli á bifreiðum sem knúnar eru með metani, en verð á því jafngildir að greiddar væru tæpar 84 kr. fyrir bensínlítrann. Það munar um minna,“ segir Einar Vilhjálmsson en hann starfar sem verkefnisstjóri við markaðsmál hjá hjá Metani hf.
Einar segir að auk þess felist þjóðhagslegur sparnaður í að nota íslenskt eldsneyti í stað innflutts auk þess hversu umhverfisvænt metanið er. „Til dæmis má nefna að það þarf 113 metanbíla til að blása út koltvísýringi á við einn bensínbíl. Þó að enn sé óljóst hvaða orkugjafi verði ofan á í framtíðinni þá séu metanbílar raunhæfur og hagkvæmur valkostur strax í dag, hvort heldur fyrir umhverfismeðvitaða einstaklinga, fyrirtæki eða stofnanir.”
Á annað hundrað ökutækja hér á landi nýtir metan að hluta eða að öllu leyti. Meðal ökutækja sem ganga eingöngu fyrir metani eru ellefu sorphirðubílar, sjö sendibílar og tveir gámaflutningabílar sem þjóna Reykjavíkurborg og tveir almenningsvagnar Strætó bs.